Por que en Lascuarenta.es non se aposta diñeiro

En Lascuarenta.es xógase con cartas españolas, pero non se aposta diñeiro. Aínda que moitas webs utilizan esa estética para presentar un casino coma se fose un xogo tradicional, esa non é a proposta deste proxecto.

Que son as Sotas?

As Sotas son unha moeda virtual decorativa. Serven para desbloquear barallas ilustradas, reversos, tapetes, marcos e ambientes de son, e para activar o plan sen anuncios durante unha semana, un mes ou un ano.

Carecen de valor monetario e non se cambian por diñeiro, non se transfiren entre xogadores nin se arriscan nas partidas. Tampouco alteran as regras: levar unha baralla distinta non dá ningunha vantaxe.

Pérdense Sotas ao perder unha partida?

O saldo de Sotas só baixa cando decides mercar algo con elas. Unha derrota non custa Sotas e tampouco hai ningún mecanismo que te empurre a xogar «unha máis» para recuperar o perdido.

Tampouco hai saldo inicial garantido nin pagamento diario fixo. De cando en vez a web fai un agasallo ao entrar, de forma aleatoria, e o modo historia reparte recompensas ao avanzar. Nada máis.

Como se financia entón a web?

Con publicidade e coa venda de elementos decorativos. A publicidade só se carga se aceptas as cookies publicitarias, e nunca se coloca sobre o tapete nin sobre as cartas no móbil ou na tableta: os bloques van fóra da zona de xogo, porque un anuncio enriba dunha baza estraga a partida.

Quen prefira non ver anuncios pode quitalos con Sotas. E os xogos, todos, son de balde e completos: non hai partidas de pagamento nin límites diarios.

Por que é tamén unha decisión estética?

Queriamos unha web co ambiente dunha mesa de bar de aldea, lonxe do aspecto dunha máquina comecartos. Por iso hai madeira, tapete, cartas grandes e calma, no canto de luces intermitentes, contas atrás agresivas ou cofres.

Se algo do que ves na web che lembra un casino, escríbenos: probablemente sexa un erro noso e cambiarémolo.